काठमाडौँ । निर्देशक रोशन दासको निर्देशनमा निर्माण भएको फिल्म ‘प्रतिवैरम’ को सम्पूर्ण छायांकन पुरा भएको छ । मधेस केन्द्रित सामाजिक र राजनीतिक विषयवस्तुमा आधारित यस फिल्मको सम्पूर्ण छायांकन ४५ दिनमा पूरा गरिएको निर्माण पक्षले जानकारी दिएको छ।
फिल्मको पहिलो चरणको छायांकन १५ दिन सर्लाहीमा गरिएको थियो भने दोस्रो चरणको छायांकन ३० दिन सिराहामा सम्पन्न गरिएको हो। फिल्मको छायांकन ज्याकले गरेका हुन् । हाल फिल्म पोष्ट–प्रोडक्सनको कार्य सुरु भएको छ ।
फिल्ममा सम्राट दास, बिरेन्द्र कुशवाहा, आलिशा बस्तोला, सुप्रज्ञा शर्मा, गीता श्री, अशिष डीके, प्रदीप ढकाल, नारायण बिके, बिके शाह, रामेश बुढाथोकी लगायत अन्य कलाकारहरूको दमदार अभिनय रहेको छ। फिल्ममा सह–निर्देशकका रूपमा सन्तोष मल्ल, अग्नि सुवेदी,धिरज राउत, र श्रीजना भुजेलले काम गरेका छन् ।
रेज इन्टरटेनमेन्टले निर्माण गरेको चलचित्रका प्रोडक्सन म्यानेजर कमल सुनार रहेका छन् भने लाइन प्रोडक्सनको जिम्मेवारी पंकज महतोले सम्हालेका छन्।
निर्देशक दासका अनुसार मधेसका वास्तविक कथा, सौन्दर्य र समस्यालाई यथार्थ ढंगले प्रस्तुत गर्ने उद्देश्यले यो फिल्म निर्माण गरिएको हो। फिल्ममार्फत मधेसको वास्तविकता दर्शक सामु पुर्याउने योजना रहेको उनले बताए। फिल्मको कथा निर्देशक दास स्वयंको रहेको छ भने पटकथा युवराज भट्टराईले लेखेका हुन्। निर्माण पक्षका अनुसार फिल्म २०८३ प्रदर्शनमा ल्याउने तयारी भइरहेको छ।
