काठमाडौं । आगामी माघ ९ गतेबाट प्रदर्शनमा आउने नेपाली फिल्म ‘परिवर्तन’ को ट्रेलर सार्वजनिक गरिएको छ। सार्वजनिक ट्रेलरमा फिल्मको एक्सन–सस्पेन्स कथावस्तु, द्वन्द्व दृश्य र पात्रहरूको सम्बन्धलाई प्राथमिकताका साथ प्रस्तुत गरिएको छ। ट्रेलरमार्फत अभिनेता सुशील श्रेष्ठलाई एक्सन अवतारमा प्रस्तुत गरिएको छ भने अभिनेत्री अञ्जना बराईलीसँगको केमेस्ट्री पनि देख्न सकिन्छ। उनी प्रहरी इन्पेक्टरको भुमिकामा देखिएकी छन्।
ट्रेलरमा सरोज खनाल, करिश्मा मानन्धर,बुद्धि तामाङ,हेमन्त बुढाथोकी,सुवास मेचे लगायतलाई देख्न सकिन्छ। सत्ताका लागि नेताले जे सुकै पनि गर्न सक्छन् भने कुरालाई ट्रेलरमा देखाइएको छ ।
दिव्यासी फिल्म्सको ब्यानरमा निर्माण भएको फिल्ममा सुशील श्रेष्ठ र अञ्जना बराईली का अलावा सरोज खनाल, करिश्मा मानन्धर, बुद्धि तामाङ, हेमन्त बुढाथोकी र सुवास मेचे को मुख्य भूमिका रहेको छ।
एक्सन–सस्पेन्स विधा मा निर्माण गरिएको यस फिल्मको निर्देशन विजय केरुङले गरेका हुन्। दीपक शिवाकोटी को कथा तथा निर्माण रहेको फिल्मको पटकथा तथा संवाद शिवम् अधिकारी ले लेखेका छन्।
फिल्ममा बन्दे प्रसादको सम्पादन, रामजी लामिछानेको कोरियोग्राफी, एसडी योगीको संगीत तथा द्वन्द्व निर्देशन श्री श्रेष्ठ को रहेको छ। यसअघि सार्वजनिक पोस्टर र टिजरका साथै ‘पाकेको चिउरी’ बोलको गीतले दर्शकमाझ चासो बढाइसकेको यस चलचित्रलाई आरआर फिल्म्सले वितरण गर्दैछ।
