काठमाडौं । फिल्म ‘अभिमन्युः च्याप्टर १’को नयाँ गीत रिलिज भएको छ । ‘मरौं ज्यानले‘’ बोलको गीत निर्माणपक्षले विजया दशमीका दिन सार्वजनिक गरेको हो ।
गीतमा सुरेश बादलको शब्द रहेको छ । सुशान्त गौतमको संगीत तथा स्वर रहेको छ । प्रेममा लीन भएको प्रेम जोडीको प्रेम, गीतमा समेटिएको छ । प्रेममा परेको जोडी प्रेमबिना बाँच्न सक्ने अवस्थामा नरहेको तर मर्न पनि नसक्ने अवस्था गीतले चित्रण गरेको छ ।
बाहिर देख्दा कठोर देखिने व्यक्तिको भित्री हृदय कोमल हुने भन्दै गीतले एकले अर्कोको मनमा बसेको विषय उल्लेख गरेको छ । प्रेमिल गीतले सिनेमाका दुई मुख्य पात्रको प्रेम देखाएको छ । भिडियोमा फिल्मका मुख्य दुई पात्र कामेश्वर चौरसिया र लक्ष्मी बर्देवाको प्रेम देखाइएको छ ।
असोज २४ गतेदेखि प्रदर्शनमा आउन लागेको फिल्म नेपाली र हिन्दी दुवै भाषामा रिलिज हुँदैछ । सेभेन सिज सिनेमाको प्रस्तुति निर्माण भएको फिल्ममा कामेश्वर चौरसिया, सरिता गिरी, किरण श्रेष्ठ, लक्ष्मी बर्देवा, गौमाया गुरुङ, प्रकाश दाहाल, शिशिर वाङ्देल मुख्य भूमिकामा छन् ।
सुशान्त गौतमको निर्देशन रहेको फिल्मको क्रिएटिभ निर्देशक मदन थापा हुन् । यस फिल्ममा मुकेश खनालको लेखन रहेको छ । फिल्मका निर्माता विनोद पौडेल र गुञ्जन गिरी हुन् । रमेश चौलागाईं र हरि श्रेष्ठ सह–निर्माता रहेको फिल्मका कार्यकारी निर्मातामा विशाल लामा, हरि मोक्तान, कृष्ण भट्टराई, नीराजन लुइँटेल र सन्देश श्रेष्ठ रहेका छन् । फिल्मको लाइन प्रोड्युसरमा जीवन शाक्य रहेका छन् ।
शरद महतोको डिओपी रहेको यस फिल्ममा मनोज श्रेष्ठको भिएफएक्स, जुनिम गहतराजको रंग संयोजन, मदन घिमिरेको सम्पादन रहेका छ ।
