काठमाडौं । चलचित्र विकास बोर्डले काठमाडौँ उपत्यकाभित्र सञ्चालनमा रहेका फिल्म हलका लागि आयोजना गरिएको चलचित्र विकास शुल्क पोर्टलसम्बन्धी तालिम पुरा भएको छ । गत सोमबार र मंगलबार सञ्चालन गरिएको उक्त तालिममा पहिलो दिन काठमाडौँ उपत्यकाभित्रका १३ वटा फिल्म हलका १८ जना तथा दोस्रो दिन १४ वटा फिल्म हलका २० जना प्रतिनिधिहरूको सहभागिता रहेको थियो।
तालिममा चलचित्र विकास शुल्कसम्बन्धी विद्यमान कानुनी व्यवस्था, यसको कार्यान्वयन अवस्था, डिजिटल पोर्टलको आवश्यकता र औचित्य, साथै शुल्क व्यवस्थापनमा पोर्टलको प्रभावकारिताबारे विस्तृत जानकारी प्रदान गरिएको थियो। साथै, सहभागीहरूलाई पोर्टलको सैद्धान्तिक अवधारणासँगै व्यवहारिक प्रयोगसम्बन्धी प्रशिक्षणसमेत दिइएको थियो।
कार्यक्रममा बोल्दै चलचित्र विकास बोर्डका अध्यक्ष दिनेश डिसीले चलचित्र विकास शुल्क पोर्टलले शुल्क संकलन र व्यवस्थापन प्रक्रियालाई थप पारदर्शी, सहज र उत्तरदायी बनाउने विश्वास व्यक्त गरे। ‘डिजिटल प्रणालीमार्फत शुल्क व्यवस्थापनलाई व्यवस्थित बनाउँदै फिल्म उद्योगलाई आधुनिक प्रविधिसँग जोड्नु बोर्डको प्राथमिक लक्ष्य हो। यस पोर्टलले दीर्घकालीन रूपमा उद्योगको संस्थागत विकासमा महत्वपूर्ण भूमिका खेल्नेछ’, उनले भने ।
यसअघि बोर्डले सुदूरपश्चिम, कर्णाली, लुम्बिनी प्रदेश तथा बागमती प्रदेशअन्तर्गत चितवन जिल्लाका चलचित्र घरहरूका लागि पनि यस्तै तालिम कार्यक्रम सफलतापूर्वक सम्पन्न गरिसकेको छ भने माघ २ गतेदेखि माघ ७ गतेसम्म गण्डकी प्रदेशका चलचित्र घरहरूलाई चलचित्र विकास शुल्क पोर्टलसम्बन्धी तालिम प्रदान गर्ने कार्यतालिका तय गरिएको छ।
चलचित्र विकास बोर्डले यस्ता तालिम कार्यक्रममार्फत चलचित्र उद्योगलाई डिजिटल प्रणालीसँग आबद्ध गर्दै शुल्क व्यवस्थापन प्रक्रियालाई थप व्यवस्थित, पारदर्शी र प्रभावकारी बनाउने लक्ष्य लिएको जनाएको छ।
