मुम्बई(एजेन्सी)। सन् २०१७ मा रिलिज भएको शाहरुख खानको फिल्म ‘रइस’ले बक्स अफिसमा किङ खानको फिल्मको हिसाबले व्यापार गर्न नसके पनि पाइरेसी गर्ने समूहका लागि भरपुर फाइदा दिलायो । भारतमा गरिएको एक सर्वेमा यो फिल्म पाइरेसीको मामलामा नम्बर एक बनेको देखिएको छ ।
भारतीय सञ्चारमाध्यमका अनुसार पाइरेसीका लागि विश्वव्यापी रुपमा जति नै सुरक्षा सतर्कता अपनाए पनि न त पाइरेसी कम भएको छ न त यसलाई नियन्त्रणका लागि कुनै उपाय नै अपनाइएको छ । जर्मनीको एक आइटी फर्म टेकजिपिओ जीएमबीएचले गरेको रिर्पोट अनुसार शाहरुखको फिल्मलाई ६ दशमलब २ मिलियन पटक नेटवर्कमा शेयर गरिएको छ । टप डाउनलोड र पÞmाइल शेयरिङमा ‘रइस’सँगै रिलिज गरिएको ऋतिक रोशन र यामी गौतमको फिल्म ‘काबिल’ दोस्रो नम्बरमा छ । ऋतिकको फिल्म ५ दशमलब २६ मिलियन पटक गैर कानूनी किसिमले शेयर गरिएको छ ।
अक्षय कुमारको फिल्म ‘जोली एलएलबी २’ ४ दशमलब ४३ मिलियन वीडियोरलिंक शेयरसँगै पाइरेसीको चपेटामा पर्ने तेस्रो फिल्म बनेको छ । अक्षय कुमारकै ‘ट्वाइलेट एक प्रेम कथा’ पनि पाइरेसीको चौथो नम्बरमा छ । ‘रइस’ र ‘काबिल’भारतका अलावा पाकिस्तान र साउदी अरबमा सबैभन्दा अधिक पाइरेट भएको छ ।
अक्षयको दुवै फिल्म र अजय देवगनको ‘गोलमाल अगेन’ भारत र पाकिस्तानसँगै युएईमा पनि पाइरेट भएको छ । यो सूचीमा २ सय करोड क्लबमा सामेल भएको फिल्म ‘गोलमाल अगेन’ सातौं, अर्जुन र श्रद्धा कपूरको ‘हाफ गर्लफ्रेन्ड’, ‘बद्रीनाथ की दुल्हनिया’, श्रद्धा र आदित्य रोय कपूरको ‘ओके जानू’, ‘द गाजी अटैक’ र ‘जुडुवा २’ पनि छन् ।
