काठमाडौँ। विश्वकै प्रतिष्ठित फिल्म महोत्सवमध्ये एक ७९औँ कान्स फिल्म फेस्टिभलमा नेपालले औपचारिक सहभागिता जनाउने भएको छ। नेपाली फिल्मको अन्तर्राष्ट्रिय प्रवर्द्धन, सहकार्य विस्तार तथा विश्व बजारमा पहुँच विस्तार गर्ने उद्देश्यसहित चलचित्र विकास बोर्डले आगामी मे १२ देखि २३, २०२६ सम्म फ्रान्सको कान्स शहरमा आयोजना हुने उक्त महोत्सवमा नेपालको प्रतिनिधित्व गर्ने तयारी गरेको हो।
यसपटक महोत्सवमा चलचित्र विकास बोर्ड र नेपाल पर्यटन बोर्डको सहकार्यमा नेपालको विशेष ‘नेपाल पवेलियन’ (स्टल–बुथ) पनि रहनेछ। सो स्टलमार्फत नेपाली फिल्म, फिल्म परियोजना, पोस्टर, ट्रेलर तथा अन्य प्रचार सामग्री अन्तर्राष्ट्रिय फिल्म बजारका वितरक, निर्माता, फिल्म फन्ड, फेस्टिभल प्रतिनिधि तथा दर्शकसमक्ष प्रस्तुत गरिनेछ।
बोर्डका अनुसार कान्स फिल्म फेस्टिभलमा व्यक्तिगत रूपमा सहभागी हुने नेपाली फिल्मकर्मीहरूले पनि बोर्डको स्टल साझा गरी आफ्नो फिल्म तथा परियोजनाहरू अन्तर्राष्ट्रिय स्तरमा प्रस्तुत गर्न सक्नेछन्, जसले नेपाली फिल्मलाई विश्व फिल्म बजारसँग जोड्ने महत्वपूर्ण अवसर सिर्जना गर्ने अपेक्षा गरिएको छ।
कान्स महोत्सवमा सहभागी हुन इच्छुक नेपाली चलचित्रकर्मीहरूलाई बोर्डसँग समन्वय गरी आफ्नो सामग्री प्रदर्शन गर्न अनुरोध गरिएको छ।
