काठमाडौँ। आगामी जेठ १५ गतेबाट प्रदर्शनमा आउन लागेको नेपाली तथा हिन्दी भाषामा निर्माण गरिएको फिल्म ‘कुम्भ’को प्रचारप्रसार तीव्र बनाइएको छ । यहीक्रममा डेब्यु अभिनेता अशोक आर्यन यादवको गृह जिल्ला सप्तरी, राजबिराजमा विशेष प्रचारात्मक कार्यक्रम सम्पन्न गरिएको छ ।
सप्तरी कलाकार संघको आयोजनामा सम्पन्न कार्यक्रममा करिब १५० भन्दा बढी कलाकार, सञ्चारकर्मी तथा स्थानीय समर्थकहरूको उपस्थिति रहेको थियो । कार्यक्रममा फिल्मको टिजर तथा गीत सार्वजनिक रूपमा प्रदर्शन गरिएको थियो ।
अभिनेता अशोकले फिल्मबारे जानकारी गराएका थिए । उनले फिल्म सफल बनाउन दर्शक तथा स्थानीयवासीसँग सहयोग र समर्थनको अपिलसमेत गरे । कार्यक्रममा सप्तरी कलाकार संघका अध्यक्ष करण शर्मा र उपाध्यक्ष कामेश्वर परदेशीले फिल्मको सफल प्रदर्शनको शुभकामना दिँदै फिल्मलाई व्यापक रूपमा चलाउने प्रतिबद्धता व्यक्त गरेका थिए । कार्यक्रममा प्रमुख अतिथि धनेश्वर यादवले समेत नेपाली फिल्म क्षेत्रमा नयाँ प्रतिभा र विषयवस्तु आवश्यक रहेको उल्लेख गर्दै ‘कुम्भ’ सफल हुने विश्वास व्यक्त गरे । कार्यक्रमलाइ भब्य रुपमा सम्पन्न पार्न सरोज आर्यन यादव र तेजनारायण शर्माले विशेष सहयोग गरेका थिए।
एक्सन–ड्रामामा आधारित फिल्ममा अशोक आर्यन यादव, सुनिल थापा, सुशील पोखरेल, रोहित रुम्बा, सृष्टि खड्का, अफ्सना थापा लगायत कलाकारहरूको अभिनय रहेको छ । दक्षिण भारतीय अभिनेता सुरेन्द्र ठाकुरको समेत अभिनय रहेको फिल्मका लेखक तथा निर्देशक रणधीर श्रेष्ठ हुन् । उनले गीतका शब्दसमेत लेखेका छन् भने संगीत अनुप तिवारीले दिएका छन् ।
ए रस प्रोडक्सनको ब्यानरमा निर्माण भएको फिल्मको छायाङ्कन तथा सम्पादन स्वयं निर्देशक श्रेष्ठले गरेका हुन् । फिल्ममा सम्राट बस्नेत, संजय थापाको द्वन्द्व छ भने निर्माता रणधीर श्रेष्ठ र राजेश साह तथा कार्यकारी निर्माता ईश्वर बल्लभ उप्रेती रहेका छन् ।
एक्सन र रोमान्सको संयोजन बोकेको चलचित्र ‘कुम्भ’ले नयाँ अनुहार र अनुभवी कलाकारको मिश्रणमार्फत नेपाली चलचित्र बजारमा नयाँ स्वाद प्रस्तुत गर्ने अपेक्षा गरिएको निर्माण पक्षले जनाएको छ ।
